Privatësia

Përditësuar më 22 tetor 2026

Kjo faqe tregon çfarë ruan Stoku (stoku.site, aplikacioni Stoku për Android dhe për orën e dorës), ku ruhet, kush e sheh dhe si fshihet. Stoku është aplikacion për regjistrimin e mallit dhe të afateve të skadimit në dyqan.

Kush është përgjegjës

Stoku. Për çdo pyetje ose kërkesë për të dhënat e tua: [email protected].

Çfarë ruhet

• Llogaria: emri i përdoruesit, koha kur u krijua dhe kur hyre për herë të fundit. Stoku s'kërkon email, numër telefoni as emrin tënd të vërtetë. Fjalëkalimin e ruan Firebase Authentication (Google) në formë të enkriptuar; Stoku s'e sheh kurrë.
• Të dhënat e dyqanit: folderat, produktet (barkodi, emri, sasia, furnizuesi), afatet e skadimit dhe fotot e fletëve që i dërgon nga telefoni te kompjuteri.
• Marketet (vetëm për merchandiserët, kur e zgjedh "Punoj si merchandiser" në hapjen e llogarisë): kjo zgjedhje, emri i secilit market dhe vendndodhja e marketit (jo e jotja), që merret kur e shton marketin ndërsa je brenda tij. Marketi bëhet pikë e përbashkët e Stoku-t (emri i marketit, vendndodhja e tij dhe emri yt i përdoruesit si ai që e shtoi): e shohin të gjithë merchandiserët, si listë e përbashkët e marketeve, që Stoku ta njohë vetë marketin kur arrijnë aty. Administratori i Stoku-t i sheh pikat në hartë, mund të shtojë një market me dorë, t'ia ndryshojë emrin ose ta fshijë.
• Skedarët Excel dhe PDF që i dërgon nga telefoni në kompjuter: fshihen vetë pas 7 ditësh.
• Grupi (vetëm nëse bëhesh pjesë e një grupi): emri yt në grup, roli, a je aktiv dhe kur ishe aktiv për herë të fundit (telefon ose kompjuter), afatet që i ndan me grupin, aktiviteti (p.sh. "e hoqi nga rafti"), njoftimet, ftesat dhe kërkesat për t'u futur. Emri i grupit dhe emri i përdoruesit të adminit të tij shihen nga kushdo me llogari që kërkon një grup ("Hyr në një grup").
• Regjistri i produkteve: barkodi, emri dhe furnizuesi i produkteve që i kontrollon administratori; i shohin të gjitha llogaritë e Stoku-t kur skanojnë. Produktet e reja që i shton ti (barkodi, emri, furnizuesi dhe emri yt i përdoruesit) i sheh vetëm administratori, derisa t'i kontrollojë.
• Fotoja e profilit, nëse e vendos.
• Njoftimet: adresa teknike e pajisjes për njoftime (pa të dhëna personale), ora që e zgjedh për njoftimin ditor dhe një kopje e afateve për atë njoftim. Nëse e lidh orën e dorës, një kod lidhjeje për të.
• Lejet e llogarisë (çfarë mund të përdorë), nëse i cakton administratori.
• Fjalëkalimi i harruar: kodi 6-shifror ruhet vetëm i enkriptuar dhe vlen 30 minuta.

Leximi i fletëve me AI

Kur e fotografon një fletë me afate ose me stok, fotoja dërgohet përmes serverit të Stoku-t te një shërbim AI (Google Gemini, Anthropic Claude ose Cloudflare Workers AI) vetëm që të lexohen barkodet, emrat dhe datat. Stoku s'e ruan foton te shërbimi i AI-së.

Në pajisjen tënde

Stoku ruan në shfletues (ose në aplikacion) një kopje të të dhënave të tua, që të punojë edhe pa internet, dhe cilësimet e tua. Kjo kopje fshihet kur në atë pajisje hyn një llogari tjetër, ose kur i fshin të dhënat e shfletuesit. Si vizitor, të dhënat mbeten vetëm në pajisje dhe s'dërgohen askund.

Vendndodhja: vetëm për merchandiserët: kur e hap Stoku-n, telefoni e krahason vendndodhjen tënde me marketet e tua dhe me pikat e marketeve të Stoku-t, që ta dijë në cilin market je. Kjo bëhet vetëm në telefon: vendndodhja jote s'ruhet dhe s'dërgohet askund (ruhet vetëm vendndodhja e marketit, kur e ruan ti). Llogarive që s'janë merchandiser, Stoku s'ua kërkon fare vendndodhjen.

Stoku s'përdor cookies, s'ka reklama dhe s'përdor shërbime gjurmimi ose analitike.

Kush i sheh të dhënat

• Ti, në të gjitha pajisjet ku hyn me llogarinë tënde.
• Anëtarët e grupit tënd, vetëm pjesët e grupit (emri, prania, afatet e ndara, aktiviteti).
• Administratori i Stoku-t, për mirëmbajtje dhe ndihmë: sheh listën e llogarive, cakton lejet, merr kodin e fjalëkalimit të harruar që ta japë, dhe mund ta fshijë një llogari. Teknikisht ka qasje edhe në të dhënat e dyqaneve.

Stoku s'i shet dhe s'ua jep të dhënat askujt tjetër.

Ku ruhen

Te shërbimet që e mbajnë Stoku-n në punë, të cilat mund t'i kenë serverët jashtë Kosovës (në BE ose SHBA):

• Google Firebase (llogaritë dhe të dhënat e dyqanit),
• Cloudflare (njoftimet, fotot e profilit, ora e dorës, serveri i AI-së),
• GitHub Pages (vetë faqja stoku.site) dhe jsDelivr (disa librari të faqes): si çdo server, shohin adresën IP kur hapet faqja,
• OpenFreeMap (pjesët e hartës, vetëm kur e hap hartën te Cilësimet → Marketet): sheh adresën IP dhe zonën e hartës që shikon; Stoku s'i dërgon asnjë të dhënë tjetër,
• Esri (pamja satelitore, vetëm kur te harta zgjedh "Satelit"): sheh adresën IP dhe zonën e hartës që shikon; Stoku s'i dërgon asnjë të dhënë tjetër,
• Google, Anthropic ose Cloudflare për leximin me AI, vetëm kur e përdor.

Sa kohë mbahen

Derisa ekziston llogaria. Përjashtimet: skedarët Excel/PDF në kompjuter 7 ditë, kodet e fjalëkalimit 30 minuta, shënimet për produktet e fshira (që pajisjet e tjera t'i fshijnë edhe ato) 120 ditë, kopja e të fshirave në pajisje 30 ditë.

Të drejtat e tua

Mund të kërkosh të shohësh, të ndreqësh ose të fshish të dhënat e tua, ose ta fshish të gjithë llogarinë: shkruaj te [email protected] nga emri i llogarisë. Produktet dhe afatet mund t'i ndryshosh ose t'i fshish vetë në çdo kohë brenda Stoku-t. Nëse mendon se të dhënat e tua s'trajtohen si duhet, ke të drejtë të ankohesh te Agjencia për Informim dhe Privatësi (AIP) e Kosovës.

Siguria

Lidhja me Stoku-n është gjithmonë e enkriptuar (HTTPS). Të dhënat e secilës llogari i mbrojnë rregullat e Firebase-it: një llogari s'mund t'i lexojë të dhënat e një tjetre. Problemet e sigurisë raportohen te [email protected] (shih edhe security.txt).

Ndryshimet

Kur ndryshon kjo faqe, ndryshon edhe data lart. Ndryshimet e mëdha njoftohen te "Çfarë ka të re" në Stoku.